Tusmada Bidhaamiye

Tusmada Bidhaamiye: Sida maanta lagu socdo, ma muuqato in Soomaali si dhab ah dib ugu midoobi karto iyadoo ay hoggaaminayaan siyaasiyiinta hadda talada iyo saamaynta ku leh dalka. Waxaan aaminsanahay in shacabka Soomaaliyeed ay ka daaleen khilaaf joogto ah, kala qaybsanaan, iyo hoggaan aan ku dhisnayn caddaalad, wada-tashi iyo himilo qaran. Taariikh ahaan, hoggaamiyeyaashu waxay leeyihiin guulo iyo qaladaad lagu xasuusto, balse waxa maanta loo baahan yahay waa aragti cusub, hoggaan mideeya shacabka, kana hormariya danta qaranka danaha shakhsiga iyo kooxaha. Aniga aragtidayda, rajada Soomaaliya waxay ku jirtaa in ay soo baxaan hoggaamiyeyaal cusub oo leh himilo qaran, isla xisaabtan, iyo karti ay shacabka ku mideeyaan. Insha Allah, KOBAC waxuu rajaynayaa in uu qayb ka noqoto dhismaha Soomaaliya mideysan, caddaalad ah, horumarsan, oo fursad u siman dhammaan muwaadiniinteeda. "Kobci Maanka – Qaranka Dhis." WQ: Gudoomiyaha Xisbiga Kobac Mudane has Abdirahman Mohamed Ali Bidhaamiye:

Waxaa isa soo taraya walaaca laga qabo jihada uu dalku u socdo iyo astaamaha muujinaya in awoodda siyaasadeed lagu uruurinayo hal meel oo keliya. Waxaan muddo dheer ka digayay in Soomaaliya ay wajahdo marxalad ay doorashooyinka xor iyo xalaal ah sii adkaanayaan haddii aan la helin heshiis siyaasadeed oo loo dhan yahay. Maanta waxaa muuqda calaamado badan oo sii xoojinaya walaacaas. Dad badan ayaa qaba in ciidamada iyo hay'adaha amniga loo adeegsanayo ujeeddooyin siyaasadeed halkii ay ka ahaan lahaayeen kuwo u adeega Qaranka iyo shacabka Soomaaliyeed. Sidoo kale waxaa jira cabsi laga qabo in hay'adaha madaxbannaan, dhaqanka Soomaaliyeed, ganacsatada, siyaasiyiinta iyo madaxda bulshada rayidka ah ay waayi karaan madax-bannaanidooda haddii awooddu sii koobnaato. Waxaa muuqata in cid kasta oo loo arko caqabad siyaasadeed ay wajihi karto cadaadis, cabsi-gelin ama ka saarid saaxadda siyaasadda. Taasi ma aha jidka lagu dhiso dowladnimo waarta. Soomaaliya waxay u baahan tahay: • Doorasho xor ah oo lagu wada kalsoon yahay. • Ciidamo qaran oo ka madax-bannaan siyaasadda. • Garsoor madax-bannaan. • Hay'ado dowladeed oo ilaalinaya sharciga. • Wadahadal qaran iyo is-afgarad. Taariikhdu waxay ina bartay in awood kasta oo ku dhisan cabsi, jujuub iyo amar keliya ay ugu dambayn fashilanto, halka awoodda ku dhisan rabitaanka shacabka ay sii noolaato. Qaran waxaa lagu dhisaa kalsooni, wada-tashi iyo cadaalad; lagumana dhiso cabsi iyo awood urursi. WQ Gudoomiyaha Xisbiga Kobac Mudane Abdirahman Mohamed Ali **Bidhaamiye**